БҚО-да су айдындарында қауіпсіздік талаптарын бұзғандарға 4 млн-ға жуық теңге айыппұл салынды
ОРАЛ. KAZINFORM — Батыс Қазақстан облысында шомылу маусымы кезінде 6 адам суға кетсе, соның төртеуі – балалар.
БҚО ТЖ департаменті бастығының орынбасары Нұралы Мүсиевтің өңірлік коммуникациялар қызметі алаңында өткен брифингте мәлім еткеніндей, соның ішінде үшеуі Жаңақала ауданында тіркелді. Сонымен қатар Сырым, Бәйтерек және Бөрлі ауданында бір-бір адамнан суға кеткен.
Оның сөзіне қарағанда, өткен жылы аталмыш мерзімде 7 адам осындай қазаға ұшыраса, соның біреуі бала еді. Бұл биыл жасөспірімдердің суға кетуі көбейіп отырғанын көрсетеді.
- Жыл басынан бері су айдындарында қауіпсіздік талаптарын сақтамағаны үшін 253 тұлға 3 млн 893 мың 844,3 теңге көлемінде әкімшілік жауапкершілікке тартылды. Соның төртеуі заңды тұлға болса, қалған 249-ы – жеке адамдар. Толтырылған хаттамалардың 59-ы Орал қаласы, 29-ы Ақжайық, 28-і Теректі, 27-сі Бәйтерек ауданының үлесіне тиеді, - деді Н.Мүсиев.
Департамент мәліметі бойынша облыста 34 жағажай болса, соның 24-інің өтінімі қаралып, 17-сіне жұмыс істеуіне рұқсат берілді.
Су айдындарындағы қауіпсіздік қағидаларының талаптарына сәйкес келмеуіне байланысты 6 коммуналдық, 1 жеке меншік жағажайға рұқсат берілмеді. Ал 10 жағажай бойынша тексеруге өтінім келіп түспеген.
- Судағы қауіпсіздікті қамтамасыз ету және оқушылардың жүзу дағдыларын қалыптастыру мақсатында облыста 5 жабық бассейн және 34 модульдік каркасты бассейн жұмыс істейді, - деп қосты департамент бастығының орынбасары.
Еске сала кетейік, бұдан бұрын Батыс Қазақстанда үш жасөспірімнің суға кетіп қалғанын жазған едік.
