БҚО-да су тасқынынан зардап шеккендерге құқықтық көмек көрсететін мобильді пункт ашылды
ОРАЛ. KAZINFORM – Батыс Қазақстан облысының прокуратурасы жергілікті атқарушы және құқық қорғау органдары қызметкерлерінің қатысуымен су тасқынынан зардап шеккен азаматтарға құқықтық көмек көрсететін 4 көшпелі мобильді қабылдау пунктін құрды.
Прокуратураның мәліметінше, қазіргі уақытта 24 бау-бақша серіктестігі мен Круглоозерное ауылын қосқанда 94 азамат қабылданып, құқықтық кеңес алған.
«Тұрғындар эвакуациялау, әлеуметтік төлемдер көрсету, судың келуі, залалдың орнын толтыру, несиені кейінге қалдыру және жер учаскесін ресімдеу мәселелері бойынша жүгінді», — делінген хабарламада.
Қабылдау барысында тұрғындарға төлемдер тәртібі және эвакуациялық пункттердің орналасқан жері түсіндірілді.
«eGOV» мобильді қосымшасы арқылы залалды өтеуге өтінім беруге көмек көрсетілді.
Мәлім болғандай, «Кабачок» бау-бақша серіктестігінің тұрғындары су басқан үйлерден мүлікті құтқару жөнінде көмекке жүгінген.
«Көшпелі қабылдау орталығында ТЖД-нің қызметкерлері де түсіндіру жұмыстарын жүргізіп, нұсқама берген. Аталған қадамнан кейін бірқатар мәселе шешілді», — деп хабарлады жергілікті прокуратураның баспасөз қызметі.
Прокуратура мамандары Балалар құқықтары жөніндегі уәкілмен бірлесіп, 2 эвакопунктте халықпен жүздесті. Оларға төлемдер мен көмек алу тәртібін түсіндірді. Эвакуация пункттері Жәңгірхан университетінің жатақханасы мен Педагогикалық колледжде орналасқанын еске сала кеткен жөн.
Саяжай алаптарының тұрғындарымен түсіндіру жүргізу арқылы Абай облысынан гуманитарлық көмек келу кезінде туындаған 1 келіспеушілік реттелді.
Мобильді қабылдау бөлмесі азаматтарға құқықтық көмекке жүгінуге және қолдау шаралары, мүліктің қауіпсіздігін қамтамасыз ету және басқа да қажетті ақпарат алуға мүмкіндік береді.
«Біз зардап шеккендерге жан-жақты көмек көрсетуге дайын екенімізді білдіреміз және қолдауды қажет ететіндердің барлығын мобильді қабылдау бөлмесіне жүгінуге шақырамыз. Азаматтарды қабылдау күн сайын сағат 09.00-ден 19.00-ге дейін мына мекенжайлар бойынша жүзеге асырылады: 1,2,3 саяжай, ш/а. Ет комбинаты, Телецентр және Коминтерн», - деп хабарлады прокуратура.