БҚО-да ірі су тасқынына дайындық жұмыстары қызу жүріп жатыр

БҚО
Фото: Үкіметтің баспасөз қызметі

ОРАЛ. KAZINFORM – Батыс Қазақстан облысында ауқымды су тасқынының алдын алу шаралары қабылданып жатыр. Бұл туралы Үкіметтің баспасөз қызметі хабарлады.

Су тасқынына қарсы жұмыстарды жүргізу үшін өңірде шоғырланған күштер тобы 6,3 мың адамнан асты.

Үкіметтің тапсырмасы бойынша елді мекендерден үлкен суды бұрып әкету және су тасқынынан келетін шығынды азайту үшін барлық күштер мен құралдар жұмылдырылды. 

БҚО
Фото: Үкіметтің баспасөз қызметі

Облыста ТЖМ-ның 1 мыңнан астам қызметкері, Ұлттық ұланның 700-ден астам, Қорғаныс министрлігінің 600 әскери қызметшісі жұмылдырылды. Жұмысқа волонтерлік ұйым қатысушылары тартылды. 1,5 мың арнайы техника жұмылдырылды, оның 790-ы БҚО-ға еліміздің басқа өңірлерінен келген.

Негізгі міндет – елді мекендердің тұрғындары мен олардың үйлерін су тасқынынан қорғау. Жайық, Шаған, Деркөл өзендерінің бойындағы жағалауды нығайту жұмыстары жүргізіліп жатыр. Атап айтқанда, 700 мың құм толтырылған қапшық және 3 710 мың тонна инертті материал төселді. Қорғаныс үйінділері 4-5 метр биіктікке дейін көтерілді. 

БҚО
Фото: Үкіметтің баспасөз қызметі

Қазіргі уақытта Оралда жедел-эвакуациялау пункттері ашылды. Өңірде «Жедел желі» жұмыс істейді, оған 512 қоңырау келіп түсті.

Соңғы жаңалықтар