БҚО-да үй алуға «жәрдемдесіп», ақша алған басшы сотталды

ОРАЛ. ҚазАқпарат  - Жаңақала аудандық сотының 30 мамырдағы үкімімен аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің бұрынғы басшысы Нұрлан Бейісов ҚР ҚК 177-бабы 3-бөлімі «г» тармағына (1997 жылғы редакциядағы) сәйкес қызмет бабын пайдаланып, алаяқтық жасағаны үшін айыпты деп танылып, мүлкін тәркілеумен бірге үш жылға бас бостандығынан айыру жазасын жалпы тәртіптегі түзету колониясында өтеуге сотталды, деп хабарлайды «ҚазАқпарат» тілшісі.

БҚО сотының баспасөз қызметінен түскен мәліметке қарағанда, «Қазақстан Республикасы Тәуелсіздігінің 25 жылдығына байланысты рақымшылық жасау туралы» ҚР Заңының 4-бабы 2-тармағы негізінде жазаны өтеу мерзімінің төрттен бір бөлігі қысқартылып, түпкілікті 2 жыл 3 ай болып белгіленді. 

Сот талқысында белгілі болғанындай, Н.Бейісов аталмыш қызметті атқара жүріп, 2014 жылғы қыркүйекте К. деген азаматтан басқа біреудің иелігіндегі үйде одан әрі тұру, сосын жария етуге септесемін деп, 50 мың теңге алған.  Биылғы ақпанда уәдесін орындамағаны үшін ақшасын қайтаруды талап еткен К-ға 10 мың теңге беріп жатқан кезде Н.Бейісов сыбайлас жемқорлыққа қарсы қызмет қызметкерлерінің қолына түскен.

Сот үкім шығарған кезде қылмыстың қоғамдық қаупін, сотталушының кінәсін мойындағанын, асырауында екі баласы бар екендігін ескерді.

Сот үкімі заңды күшіне енген жоқ.