БҚО-да жазғы демалыста 97 мыңға жуық оқушы жұмыс істемек
ОРАЛ. ҚазАқпарат – Батыс Қазақстан облысында жаз мезгілінде 97 мыңға жуық оқушы түрлі бағыттағы жұмыспен қамтылмақ, деп хабарлайды ҚазАқпарат тілшісі.
БҚО білім басқармасының басшысы Айгүл Мыңбаеваның өңірлік коммуникациялар қызметі алаңында өткен брифингіде мәлім еткеніндей, бұл – барлық оқушылардың 90,57 пайызы.
Оның айтуынша, соның ішінде 23 мыңнан астам шәкірт мектеп аумақтарын көгалдандыру, ағаш отырғызуға қатысса, 16 мыңға жуығы шығармашылық бағытта еңбектенбек. 6 мыңнан астамы спорттық-туристік, 51 мыңға жуығы зияткерлік бағыттағы жұмыстармен айналысады.
Жалпы, балалардың жазғы демалысын ұйымдастыруға 45,111 млн теңге (өткен жылы – 38,426 млн) бөлінді.
-Облыста барлығы қала сыртында 20 лагерь болса, оның біреуі (Казталов ауданының «Алау» лагері апатты жағдайда) жұмыс жасамайды. Қалған 19 лагерьде 7 мыңға жуық, мектеп жанындағы тамақтануы ұйымдастырылатын 283 лагерьде 29 мыңнан астам оқушы демалмақ. Сондай-ақ тамақ ұйымдастырылмайтын 292 лагерьде 55 мыңға жуық, шатырлы лагерьлерде 2 мыңнан астам бала болмақ. Оған қоса жекелеген санаттағы 29 мыңға жуық оқушы демалыспен қамтылмақ, - дейді А.Мыңбаева.
Басқарма басшысының сөзіне қарағанда, білім сапасын арттыру, пандемия, шектеу шаралары кезінде жіберілген олқылықтардың орнын толтыру мақсатында 1-8, 10-сынып оқушылары үшін 26 мамыр мен 17 маусым аралығында жазғы мектеп ұйымдастырылып отыр. Ондағы сабақ түрі: жобалық қызмет, зертханалық жұмыстар, таза ауадағы сабақтар. Үйге тапсырма берілмейді. Оқу пәндері бойынша сабақтың ұзақтығы – 40 минут, күніне 3-4 сабақ. Оқу процесін жүзеге асыру үшін волонтер студенттерді тартуға рұқсат етіледі.
Облыс бойынша биыл 379 мектепте барлығы 114 258 шәкірт оқу жылын аяқтады. Соның 5687-сі (2021 жылы – 5916) – мектеп түлкетері. 9250-і (2021 жылы – 8690) – 9 сыныпты бітірушілер. «Алтын белгіден» 316 (2021 жылы – 430), үздік аттестаттан 304 (2021 жылы – 185) түлек үміткер.
«Мектеп түлектерінің қорытынды аттестаттауы 27 мамырда басталады. 9 (10) сынып оқушыларының қорытынды бітіру емтихандары 28 мамыр мен 6 маусым аралығында өтеді», деді А.Мыңбаева.
Еске сала кетейік, бұдан бұрын Батыс Қазақстанда 4800-ден астам түлектің ҰБТ тапсыратынын жазған болатынбыз.
