БҚО-да жоғалып кеткен жасөспірімнің денесі өзеннен табылды
ОРАЛ. KAZINFORM – Батыс Қазақстан облысында жоғалып кеткен жасөспірімнің денесі екі күннен кейін Жайық өзенінен табылды.
БҚО ТЖ департаментінің баспасөз қызметінен мәлім еткеніндей, 8 шілде күні Теректі ауданы Қабылтөбе ауылы тұсында жедел құтқару жасағының күшімен 2008 жылғы жасөспірімнің денесі өзеннен шығарылды. Марқұм киімшең күйінде болған.
«Аталған жасөспірім 6 шілде күні демалыс кезінде белгісіз жағдайда жоғалып кеткен. Өлімнің себебі анықталып жатыр. Полиция департаменті сот-медициналық сараптама тағайындады», - деп хабарлады ведомстводан.
Теректі ауданы ТЖ бөлімінің басшысы Нұрсұлтан Серіковтің нақтылауынша, жасөспірім жазғы демалыс кезінде Ақтау қаласынан осы аудандағы тума-туысқандарына қыдырып келген.
Еске сала кетейік, бұдан бұрын Батыс Қазақстанда жол апатынан төрт адамның мерт болғанын жазған едік.
