БҚО-да жол апатынан үш адам зардап шекті

ОРАЛ. ҚазАқпарат - Бүгін Батыс Қазақстан облысында жол-көлік оқиғасы болып, үш адам жарақат алды, деп хабарлайды «ҚазАқпарат» тілшісі.

Оқиға таңертең сағат 09.30 шамасында орын алған. Самара-Шымкент күре жолының 339-шақырымында Сырым ауданы Алғабас ауылы тұсында «ВАЗ-2114» автокөлігі жолаушылар автобусына соғылған. Соның салдарынан үш адам жарақат алған.

Облыстық ішкі істер департаменті бастығының орынбасары Талғат Ахаевтың айтуынша, «ВАЗ-2114» автокөлігінің рулінде Сырым аудандық ішкі істер бөлімінің учаскелік инспекторы болған. Оның жарақаты ауыр болғаннан кейін Оралға жеткізілді.

Облыстық клиникалық аурухана директоры Ерлан Тоқсановтың сөзіне қарағанда, жол апатынан ауыр жарақат алған адамға дәрігерлік көмек көрсетілуде.

Қазіргі кезде оқиғаның себеп-салдары анықталу үстінде.