БҚО: Елбасы Жолдауын әскери қызметшілер де қолдайды (фото)
«Батыс» өңірлік қолбасшылығының баспасөз қызметінен түскен мәліметке қарағанда, жиында Орал гарнизонының әскери прокуроры, әділет подполковнигі Алтынбай Раев Елбасының «Нұрлы жол - болашаққа бастар жол» атты Жолдауының негізгі бағыттарын түсіндіріп берді. «Елбасы Жолдауын жыл сайын қазақстандықтар асыға күтеді. Онда елдің экономикалық-әлеуметтік дамуының барлық бағыттары нақтыланады. Соның ішінде қоғамдағы өзгерістер, жаңа бастамалар Қазақстан Қарулы күштерін де айналып өтпейді», деді А.Раев.
Бұдан кейін «Батыс» өңірлік қолбасшысының тәрбие және әлеуметтік-құқықтық жұмыстар жөніндегі орынбасары, полковник Берік Омаров ел дамуы үшін барлық жағдай жасалып отырғанын, әскердің бейбітшілік пен қауіпсіздік кепілі болып қала беретінін атап өтіп, Елбасы Жолдауына сәйкес алда тұрған мақсат-міндеттерге тоқталды. Сондай-ақ БҚО қорғаныс істері жөніндегі департамент бастығының орынбасары, подполковник Марат Есенов, ҚР ҰҚК Шекара қызметі 2029-әскери бөлімінің аға офицері, майор Глеб Рыбалкин, 5517-әскери бөлімінің командирі, подполковник Аян Есжанов ел өміріндегі аса маңызды құжатты барлық әскери қызметшілер басшылыққа алуы қажеттігін жеткізді.