БҚО-ның креаторлары Creative Aimaq жобасы аясында 5 млн теңгенің өнімін сатты
АСТАНА. KAZINFORM — 26-27 қыркүйекте Астанадағы Qazaq Creative Hub алаңында Қазақстан Республикасы Мәдениет және ақпарат министрлігінің қолдауымен Creative Aimaq республикалық жобасы аясында Батыс Қазақстан облысының «Жайық толқыны» креативті көрмесі өтті.
Өңір креаторлары көрмеде Батыс Қазақстанның шығармашылық әлеуетін танытып, жергілікті брендтер мен авторлық туындыларын ұсынды.
Жәрмеңкеге қолөнер шеберлері, суретшілер, зергерлер, дизайнерлер, ағаш және тері өңдеу ісінің 40-тан астам маманы қатысты.
Көпшілікке музыкалық аспап жасау, ағаш өңдеу және сәндік-қолданбалы өнер бұйымдарын әзірлеу бойынша шеберлік сабақтары өткізілді.
Бағдарламада жергілікті дизайнерлердің топтамалары да ұсынылды. «Мария ханым» сән үйі, AS_brands.kz және «ДариЛили» сән орталықтары өз топтамаларын таныстырды.
Көрмеде Батыс Қазақстанның тарихи-мәдени мұрасы да жан-жақты таныстырылды. «Балбалтас баяны» және «Музей мұрасы» жобалары арқылы облыстың тарихы мен құнды мұралары көпшілікке кеңінен насихатталды. Сондай-ақ «Долана» мультфильмі көрсетілді.
Екі күн ішінде көрмеге 3 мыңға жуық адам барды. Өңір креаторлары 5 млн теңгенің өнімін сатты.
Creative Aimaq жобасы өңір креаторларын қолдауға, отандық брендтерді кеңінен танытуға, креаторлардың өз өнімін нарыққа шығаруына жағдай жасауға, ұлттық мұраны дәріптеуге және креативті кәсіпкерлікті дамытуға бағытталған.
