БҚО тұрғыны бас үйітемін деп күйіп қалды
ОРАЛ. ҚазАқпарат – Батыс Қазақстан облысында тұрғын қойдың басын үйітемін деп жүріп күйіп қалды, деп хабарлайды ҚазАқпарат тілшісі.
БҚО Төтенше жағдай департаментінің баспасөз қызметінен түскен мәліметке қарағанда, оқиға 31 шілде күні сағат 20.10-да Бәйтерек ауданы Мичурин ауылында болды.
Комсомол көшесі 62Б-мекенжайында тұратын 1956 жылғы тұрғын газ баллонының көмегімен қойдың басын үйіткен. Өрт қауіпсіздігі ережесін сақтамау салдарынан баллонның шлангісі шығып кетіп, ер адам 2-3 дәрежелі күйік жарақатын алған. Аяқтары, арқасы, кеудесі, беті күйген.
Денесінің 50 пайызын күйік шалған тұрғын қалалық көпбейінді ауруханаға жатқызылды.
Облыстық денсаулық сақтау басқармасы баспасөз қызметінің нақтылауынша, денесінің 50-55 пайызын күйік шалған ер адамның жағдайы ауыр. Дегенмен есін біледі, сұрақтарға жауап береді.
