БОКС: Головкин Мюррейді 8-ші раундқа дейiн-ақ сұлатады - Роман Жайлауов

АСТАНА. ҚазАқпарат - Кәсiпқой бокста жеңiлiп көрмеген жас қазақстандық боксшы Роман Жайлауов boxingnews.kz порталында жақында болатын Головкин-Мюррей жекпе-жегi турасындағы ойларымен бөлiстi.

«Мен Мюррейдiң тек бiр жекпе-жегiн көрдiм. Онда ол Мартинестен жеңiлдi. Менiңше, оның Головкинмен болатын кездесуi қызық өтедi, бiрақ оның жеңiске еш үмiтi жоқ. Гена британдықты 8-ші раундқа дейiн-ақ сұлатады», - дейдi Р.Жайлауов.

Еске сала кетейiк, Роман 13 кездесу өткiзiп, 13-iнде (8 нокаут) жеңiске жеткен. Соңғы кездесуiн 13 желтоқсанда Артем Комарға қарсы өткiздi және қазылар алқасы бiрауыздан қазақ боксшысына жеңiс бердi. Келесi жекпе-жек ақпан айында өтедi.

Ал Головкин-Мюррей кездесуi 21 ақпанда Монакода өтетiнiн еске саламыз. Букмекерлер мен көптеген бокс мамандарының пiкiрiнше, Головкин бұл жекпе-жекте айқын фаворит болып табылады.