БОКС: Қазақстандық Жанат Жақиянов Еуропа чемпионы атағынан дәмелі
АСТАНА. 19 желтоқсан. ҚазАқпарат - Жеңіл салмақта (53,5 келіге дейін) өнер көрсететін қазақстандық боксшы Жанат Жақиянов (21-1, 14 КО) EBU нұсқасы бойынша Еуропа чемпионы атағына таласпақ, деп хабарлайды Vesti. kz.
Жақияновқа қарсы француз Кәрім Герфи (20-2, 5 КО) шығады.
Басылым ақпараты бойынша, француздардың жеңіске тіккен жүлдесі 62 000 еуро, бұл сома Жақияновтың мүддесін көздейтін Hatton Promotions компаниясы төлемек болған 25 696 еуродан әлдеқайда артық. Аталған жекпе-жек Францияда өтеді. Нақты қай күні өткізілетіні таяуда белгілі болмақ.
Еске сала кетейік, Герфи Европа чемпионы титулына қыркүйек айында бельгиялық Стефан Хамойимен болған жекпе-жекте иеленген. Француз 12 кезеңдік кездесуде төрешілердің шешіміне сай жеңіске жеткен болатын.
Жақияновтың соңғы жекпе-жегі шілде айында Минскіде өтті. Қазақ спортшысы жетінші кезеңде украиндық боксшы Юрий Ворониннен басым түскен болатын.
