Бокстан халықаралық кездесуде Қазақстанның әйелдер құрамасы барлық матчта жеңіске жетті

АСТАНА. ҚазАқпарат - Бүгін Алматы облысындағы Талғар ауданында Бүкіләлемдік бокс академиясында (АІВА) өткен Моңғолия, Ресей, Өзбекстан және Қазақстан құрамаларының бокстан халықаралық кездесулеріндегі барлық 3 матчта Қазақстанның әйелдер құрамасы жеңіске жетті. Бұл туралы «Қазақстандық бокс федерациясы» қауымдастығының баспасөз қызметі хабарлады.

Сайыстардың соңғы күні қазақстандық спортшы қыздар 7.2 есебімен Ресей командасын жеңді. Бұл матчқа біздің ұлттық құраманың тәлімгері Вадим Присяжнюк команда көшбасшылары - соңғы республикалық біріншілік жеңімпаздарын қойды.

2012 жылғы әлем чемпионатының қола жүлдегері Назым Қызайбай (48 келі) Екатерина Пинигинаны 3:0 есебімен, Дина Жоламан (54 келі) Лилия Айтбаеваны 2:1, Гүлжан Үбіниязова (60 келі) - Наталья Шадринаны - 3:0, Зарина Цолоева (64 келі) - Александра Ординаны - 2:1, Дариға Шәкімова (69 келі) - Саадат Абдуллаеваны - 3:0, Олимпиадалық ойындардың қола жүлдегері Марина Вольнова (75 келі) - Екатерина Надолинскаяны 3:0, Ләззат Күнгейбаева (81 келіден астам) - Саида Гамидованы 3:0 есебімен тізе бүктірді.

Ал Жанна Басқаева (57 келі) Елена Граинарға 1:2 есебімен, Мөлдір Базарбаева (81 келіге дейін) Любовь Пашинаға 0:3 есебімен жол берді.

Бүгінгі өткен басқа матчта Моңғолия боксшылары Өзбекстан спортшыларынан басым түсті.