Болашақта жылына 5 миллион турист қабылдауды жоспарлап отырмыз – Түркістан әкімінің орынбасары
ТҮРКІСТАН. ҚазАқпарат - Түркістан облысы әкімінің орынбасары Рашид Аюпов түрік және қазақстандық бизнесмендер қауымдастығының (ТУКИБ) бас хатшысы Анзор Гусейновпен кездесті.
Тараптар өңірдегі инвестициялық ахуалды жақсарту мен түрік және қазақстандық кәсіпкерлер арасындағы іскерлік байланыстар мен ынтымақтастықты ынталандыру мәселелерін сөз етті, деп хабарлайды ҚазАқпарат тілшісі.
Басқосуда сондай-ақ екі ел арасындағы әлеуметтік-мәдени байланыстарды нығайту мәселелері талқыланды.
«Барлық жұмыстар Түркістан қаласын дамытудың 2050 жылға дейінгі кешенді Бас жоспарына сәйкес жүргізілуде. Қала тарихи және туристік орталыққа айналады. Болашақта жылына 5 миллион адамды қабылдауды жоспарлап отырмыз. Түркістан облысында Түркиямен бірлескен инвестициялық жобалар жүзеге асырылды және болашақта агроөнеркәсіп кешенін және өңдеу саласында олардың санын арттыру қолға алынады», - деді Рашид Аюпов.
Кездесу барысында облыс әкімінің орынбасары қонақты Түркістан облысының инвестициялық мүмкіндіктерімен таныстырып, Түркия кәсіпкерлерін бірлесіп жұмыс істеуге шақырды.
