Боливия президенті жаппай наразылықтарға байланысты елде төтенше жағдай енгізді
АСТАНА. KAZINFORM — Bolivia президенті Родриго Пас елдегі жаппай наразылықтар аясында төтенше жағдай режимін енгізді. Бұл туралы Kazinform агенттігі BBC-ге сілтеме жасап хабарлайды.
Елде 50 күннен астам уақытқа созылған наразылық акциялары экономика жұмысына елеулі кері әсер еткен.
Президент Родриго Пас халық пен бұқаралық ақпарат құралдары өкілдеріне үндеу жасады.
— Елдегі жолдарды ашу үшін төтенше жағдай режимін енгізуді тапсырдым. Боливия азаматтары жұмыс істеу, білім алу, медициналық көмекке жүгіну, азық-түлікпен қамтылу және өнімдерді үйлеріне жеткізу мүмкіндігін шектеу жағдайында қала алмайды, — деді ол.
Президенттің айтуынша, төтенше жағдай қалыпты өмірді бұзу үшін емес, оны қалпына келтіру үшін енгізілген.
Сондай-ақ үкімет адал диалог жүргізуге дайын тараптар үшін ашық екенін мәлімдеді.
CNN мәліметінше, наразылық білдіруші кәсіподақтардың жолдарды жабуы салдарынан елдің кей өңірлерінде азық-түлік, жанармай және дәрі-дәрмек тапшылығы туындаған.
Соңғы 50 күнде бұл жағдай экономиканы айтарлықтай тежеген.
Наразылықтар мамыр айында басталды.
Оған президенттің бюджет тапшылығын азайту мақсатында көп жылдан бері беріліп келген жанармай субсидияларын қысқарту туралы шешімі түрткі болған.
Экономикалық дағдарысқа тап болған елде шетел валютасының тапшылығы байқалады.
Табиғи газ экспорты күрт азайып, инфляция соңғы 40 жылдағы ең жоғары деңгейге жеткен.
Наразылыққа жұмысшылар кәсіподағы, фермерлер және бұрынғы президент Evo Morales жақтастары қосылған.
Олар президенттің отставкасын, жалақыны көтеруді және жанармай тапшылығын жоюды талап етіп отыр.
Осыған дейін Берлинде бірнеше мың адам Германия үкіметінің саясатына қарсы жаппай ереуілге қатысқаны туралы жаздық. Белсенділер Бранденбург қақпасына жиналып, көпшілігі канцлер Фридрих Мерц бастаған Германия үкіметінің дереу отставкаға кетуін талап етті.
