Болжам: Алдағы 50 жылда Сырдария мен Амудария арнасы 15 пайызға кемиді
АЛМАТЫ. ҚазАқпарат - Алдағы 50 жылда Сырдария мен Амудария арнасы 15 пайызға кемиді. Бұл туралы «Орталық Азиядағы су ресурстарының болашағы» форумында сарапшы Сағит Ибатуллин мәлім етті.
«Мұздақтар ақырындап еріп жатыр. Орталық Азиядағы тау шыңдарындағы мұз қоры соңғы 40 жылда 25 пайызға азайды. Өкініштісі, 6-10 жылда су ағысы еріген мұз есебінен көбейіп, арна толып ағуы мүмкін. Содан кейін мұздардың айтарлықтай «жұқарғанын» көретін боламыз», - дейді С.Ибатуллин.
Оның бұл болжамына сүйенсек, осы қарқынмен Сырдария 10-12, Амудария 10-15 пайызға азаяды.
«Бұл 50-70 жылға арналған болжам», - деп нақтылай түсті ол сөзін.
Сонымен қатар, ол жер-су ресурстарының тозып бара жатқанын, биоалуандылықтың жоғалып бара жатқанын айтты.
