Боран, күшті жел: БҚО-да республикалық жол жабылды

ОРАЛ. ҚазАқпарат – Батыс Қазақстан облысында ауа райының нашарлауына байланысты республикалық жол жабылды, деп хабарлайды ҚазАқпарат тілшісі.

«ҚазАвтоЖол» ЖШС мәліметі бойынша 29 наурыз күні жергілікті сағат 10.10-нан бастап республикалық маңызы бар Орал-Тасқала-РФ шекарасы (76-104 км, Тасқала ауылынан Ресей шекарасына дейін) жолында барлық көлік түрлері үшін қозғалысқа шектеу қойылды.

Жабылу себебі – боран, күшті жел, жолдың көрінбеуі.

Осыған байланысты БҚО ТЖ департаменті ескерту жариялап, аталмыш бағытта тұрғындарға жолға шықпау керектігін жеткізді.