Бораннан кейін төрт қаланың әуежайлары қалыпты жұмыстарына кірісті

АСТАНА. ҚазАқпарат - 11 қаңтар күні соққан бораннан кейін Астана, Қарағанды, Көкшетау және Павлодар қалаларының әуежайлары штаттық режімдегі жұмыстарына қайта кірісті, деп хабарлайды «ҚазАқпарат» ХАА тілшісі ҚР ИДМ Азаматтық авиация комитетінің Фейсбуктегі парақшасына сілтеме жасап.

Ведомствоның хабарлауынша, тұрақты рейстер белгіленген кестеге сәйкес орындалуда.

Астана қаласының әуежайында аздаған қар мен жаяу бұрқасын байқалады. Ауа температурасы -14 градус. Секундына 7-9 метр жылдамдықпен жел соғуда, көріну қашықтығы - 1100 метр.

Қарағанды қаласының әуежайында да аздаған қар жауып, жаяу бұрқасын соғуда. Ауа температурасы -10 градус. Желдің жылдамдығы секундына 10 метрді көрсетсе, көріну қашықтығы 1300-1600 метр аралығында. 

Ал Көкшетау қаласының әуежайында ауа температурасы -23 градусты көрсетіп, желдің жылдамдығы секундына 8 метрді құрауда, көріну қашықтығы - 10 шақырым.

Павлодар қаласының әуежайында жаяу бұрқасын байқалады. Ауа температурасы -9 градус. Желдің жылдамдығы секундына - 6 метр. Көріну қашықтығы - 10 км.

Еске сала кетсек, кеше ақ түтек боранға байланысты Астана қаласындағы Нұрсұлтан Назарбаев халықаралық әуежайының жұмысы тоқтатылған болатын. Жоспарланған 27 рейс орындалмай, тағы 19-ы кешіктірілген еді. Әуежай сағат 17:00-де қайта ашылып, штаттық режімдегі жұмысына кірісті.