Бойдақтар күнінде «Алибаба» платформасындағы сауда айналымы 25 млрд доллардан асып кетті
АСТАНА. ҚазАқпарат - 2017 жылғы 11 қараша күні 24:00 болғанда «Алибаба» интернет сауда алаңында Бойдақтар күніне арналған жаһандық сауда-саттық тоқтатылды. Электронды коммерция гигантындағы сауда айналымы 168 млрд 269 млн юаньды (25,38 млрд доллар) құрады. Бұл жайлы Синьхуа хабарлайды.
Бұл - бөлшек сауда саласындағы әлем рекорды болды. Ұялы телефондар арқылы жасалған сауда көлемі 90%-ті құрады. «Алипэй» (Alipay) арқылы төленген төлемдер мөлшері былтырғыға қарағанда 41%-ке өсіп, 1,48 млрд-қа жетті.
Тауарларды жеткізіп беруге рәсімделген тапсырыстардың саны 812 млн (+23%) болды. Биылғы жаппай саудаға әлемнің 206 елінің 140 мыңнан астам бренді қатысты. Олар 15 млн-нан астам тауарды саудаға шығарған. 24 сағаттық онлайн саудаға әлемнің 225 елінен интернет пайдаланушылар қатысты.
