«Бозоқ» қалашығы: қорық-музейді салу жұмысы қалай жүріп жатыр

АСТАНА. KAZINFORM – Елордадағы Ұлттық академиялық кітапханада өткен ғылыми-конференцияда «Бозоқ» музей-қорығын салу жұмыстарының қалай жүріп жатқаны айтылды.

— Ежелгі «Бозоқ» қалашығы 1999 жылдан 2015 жылға дейін қазылып болды. Енді оны консервацияға салып қойдық, енді ол қазылмайды. Қазіргі таңда қорық-музей аумағы 412 гектар жер, ол толығымен қоршалды. Оңтүстік және солтүстік порталы салынып болды. Биыл визит-орталығының құрылысы басталғалы тұр. Қазіргі таңда соның құжаттары жөнделіп жатыр. Ол ортағасырлық қала үлгісінде салынады, - деді «Бозоқ» музей-қорығының ескерткіштерді сақтау бөлімінің жетекшісі Жанболат Қазанбаев.

«Бозоқ» музей-қорығы директорының орынбасары Әлішер Беспалиновтың айтуынша, оңтүстік порталдың ұзындығы 140, солтүстік порталдың ұзындығы 120 метр. Сондай-ақ ұзындығы 8,7 км қоршау салынған. 

— Құрылыс жұмыстарының бірінші кезеңін жүзеге асыруға 6,5 млрд теңге бөлінді. Оған инженерлік коммуникациялар тарту, асфальт-бетон төсеу, абаттандыру, порталдарды және қоршау салу кіреді. Бірінші кезең 2027 жылы аяқтау жоспарланған. Ал жалпы жоба құрылысы 2029 жылы аяқталады, - деді ол. 

Спикердің айтуынша, өткен жылдың қорытындысы бойынша 150 мыңдай адам «Бозоқты» онлайн және оффлайн форматта тамашалаған. 

Еске салсақ, «Бозоқ» ұлттық паркінің құрылысы 2022 жылы басталды.

Ал «Бозоқ» мемлекеттік тарихи-мәдени қорығын дамыту бойынша бірлескен жоспарға 2019 жылы қол қойылған болатын.