Бозымбаев ең ірі үш кен орнынан қанша мұнай өндірілетінін айтты
АСТАНА. ҚазАқпарат - Биыл Қашағаннан 5 млн. тонна мұнай өндірілетіндігі болжануда. Бұл туралы бүгін «Арнасай» Жасыл технологиялар орталығында ҚР Энергетика министрлігі Қоғамдық кеңесінің көшпелі отырысында белгілі болды, деп хабарлайды ҚазАқпарат.
«Мұнай-газ саласы үшін 3 ірі кен орнындағы жобаларды табысты жүзеге асыру барынша маңызды. Оның біріншісі - Қашаған. 2017 жылдың 3 ақпанында «Д» аралындағы бірінші ұңғыма, 2017 жылдың наурызында «АРС-3» бірінші ұңғымасы іске қосылды. Қазіргі уақытта өндіру көлемін тәулігіне 270 мың баррельге жеткізу мақсатында шикі газды айдау құрылғысын іске қосу жұмыстары жалғасуда», - деді ҚР Энергетика министрі Қанат Бозымбаев отырыс барысында.
Оның дерегінше, ағымдағы жылы аталған кен орнынан шамамен 5 млн. тонна мұнай мен 3,1 млрд. текше метр газ өндіру жоспарланған. Айта кетерлігі, ағымдағы жылдың 4 айында Қашағаннан 2,2 млн. тонна мұнай өндірілді.
«Ал 2017 жылы Қарашығанақта 11,8 млн. тонна мұнай мен 18 млрд. текше метр өндіру жоспарланған. 7 айдың ішінде 4,3 млн. тонна сұйық көмірсутегі өндірілді. Бұл өткен жылғы көрсеткіштен 12 пайызға артық», - деді ол.
Министрдің айтуынша, жыл соңына дейін Теңіз кен орнынан 27,5 млн. тонна мұнай мен 4,5 млрд. текше метр газ өндіру көзделген. Осы жылдың 4 айында бұл кен орнынан 9,7 пайыз мұнай алынды. Бұл өткен жылғы кезең көрсеткішімен бірдей.
