Бір күннің ішінде тауар биржасы арқылы 23 000 тонна астық сатылды

АСТАНА. KAZINFORM — Бір күннің ішінде «Азық-түлік келісімшарт корпорациясы» тауар биржасы арқылы 23 000 тонна астық сатты.

«Азық-түлік келісімшарт корпорациясы» ҰК» АҚ «Еуразиялық сауда жүйесі» тауар биржасы» АҚ тауар биржасында астық сатуды бастады. Алғашқы биржалық сауда-саттық шеңберінде EXW (франко-элеватор) жеткізу шарттарымен 3-сыныпты 23 мың тонна бидай сатылды.

Сауда-саттық қорытындысы бойынша сату бағалары:

• 3-сыныпты бидай (желімтек 23-24%) — ҚҚС-мен 85 000 теңге/тонна;
• 3-сыныпты бидай (желімтек 25-26%) — ҚҚС-мен 88 000 теңге/тонна;
• 3-сыныпты бидай (желімтек 27+%, Hi-pro) — ҚҚС-мен 130 000 теңге/тонна.

— Ұлттық астық операторы тауар биржасында белсенді жұмысын жалғастыруда және барлық мүдделі тараптарды сауда-саттыққа қатысуға шақырады. Тауар биржасы астықты сатуға ыңғайлы платформаны ұсынады, сондай-ақ нарықтың барлық қатысушысы үшін ашықтық пен бәсекеге қабілетті жағдайларды қамтамасыз етеді. Биржадағы сауда сессиясы жұмыс күндері сағат 10.00-ден 17.00-ге дейін өтеді. «Азық-түлік келісімшарткорпорациясы» ҰК» АҚ сатып алушылар мен серіктестерді астықты ресми сауда алаңы арқылы сатып алу мүмкіндігін пайдалануға шақырады, — делінген корпорация таратқан ақпаратта.

Бұған дейін Президент Үкіметке Азық-түлік корпорациясы арқылы шаруалардан астық сатып алуды тапсырғанын жазған едік.