Бір жылда суық судың тарифі 88,4 пайыз өскен

АСТАНА. KAZINFORM – Наурыз айында ел бойынша тұрғын үйді жалға алу төлемі жылдық мәнде 14,9%,  жаңа жеңіл көлік бағасы 21,6%, картоп бағасы 66,4%, суық су тарифі 88,4 пайыз өскен. Бұл  туралы Ұлттық статистика бюросының наурыз айындағы бағалар туралы ресми мәліметінде айтылған.

Ресми статистика бойынша, наурыздағы инфляция 2024 жылдың наурызындағы көрсеткіштен 10 пайыз жоғары болған. Оның ішінде ақылы қызметтердің бағасы бір жылда 14,3%, азық-түлік емес тауарлар құны 9,1%, азық-түлік тауарлардың бағасы 7,6% өскен.

Тарифтердің ішінде әсіресе суық сумен жабдықтау құны қатты көтерілген – бір жылда 88,4%. Сондай-ақ су бұру тарифі 23,7%, орталықтан жылыту тарифі 19%, ыстық су тарифі 14,6%, электр тарифі 14,3%, тұрмыстық газды құбыр арқылы тарату тарифі 13,3%, қоқыс шығару тарифі 11,1%, тұрғын үйді күтіп ұстауға жұмсалған төлем 11% өскен.

Байланыс қызметтерінің бағасы 13,9%, денсаулық сақтау қызметтерінің бағасы 13,4%, көлікке техникалық қызмет көрсету және жөндеу бағасы 12,9%, шаштараздардағы баға 12,6%, қоғамдық орында тамақтану құны 11,3% артқан. Ал темір жол билеті 23,6%, қалалық автобуспен қатынау 11,2%, ұшақ билеті 10% қымбаттаған. Тұрғын үйді жалға алу төлемі 14,9% өскен.

Ал зергерлік бұйымдар мен сағаттар 26,6%, жаңа жеңіл автомобиль 21,6%, кілем 13,9%, киім мен аяқ киім 10,9%, жиһаз 10%, баллонға құйылған сұйытылған газ 23%, ағаш 14,8% қымбаттаған.

Азық-түліктің ішінде картоп ең қатты қымбаттаған – 66,4%.

Сонымен қатар пияз бағасы 32,2%, қырыққабат бағасы 27,3%, минералды және ауыз су бағасы 17,1%, күнбағыс майының құны 16,8%, кондитерлік өнімдер бағасы 15%, қызанақ бағасы 14,9%, банан бағасы 14,6%, алкогольді ішімдіктер мен темекі өнімдерінің бағасы 13%, сары май бағасы 12,2%, жеміс және көкөніс шырындарының бағасы 11,4%, сиыр етінің бағасы 11,2%, балық және теңіз өнімдерінің бағасы 10,6% өскен.

Былтырғы наурыздан бері тек қарақұмық жармасы 17,7%, жұмыртқа 8,3%, сәбіз 7,4%, күріш 6,3% арзандаған.

Еске салсақ, жуырда ғана Дүниежүзілік банк Қазақстанның экономикалық белсенділігі 2025 жылдың басында сенімді өсім көрсеткенімен, инфляция тәуекелі сақталатынын мәлім еткен еді.