«Браконьер» іс-шарасының барысында 109 экологиялық заң бұзушылық анықталды - Қызылорда
ҚЫЗЫЛОРДА. ҚазАқпарат-Қызылорда облысында «Браконьер» жедел-алдын алу іс-шарасы барысында 27 шұғыл топ құрылған болатын. Шараның 10 күнінде облыс бойынша барлығы 109 экологиялық заң бұзушылық анықталды.
Бұл туралы ҚазАқпарат тілшісі облыстық ІІД сілтеме жасай отырып хабарлады.
Оның ішінде, заңсыз ағаштар мен бұталарды кесудің - 2, заңсыз аң аулау және аң аулау ережелерін бұзудың - 79, заңсыз балық аулаудың - 26, азаматтық қаруды тасымалдау, сақтау ережесін бұзудың 2 дерегі тіркелді.
Заңсыз аң, балық аулаумен және заңсыз бұталар мен ағаштарды кесумен ұсталған 2 автокөлік тәркіленіп, айып алаңдарына жеткізілді. Аталған мерзімде барлығы 6 қылмыстық іс қозғалып, сотқа дейінгі тергеп-тексеру амалдары жүргізілуде.
Атап айтқанда, Қызылорда облысы, Қармақшы ауданы тұсында 1979 ж.т. азаматтың басқаруындағы «ГАЗ-66» маркалы автокөлігі тоқтатылып, тексеру барысында автокөліктің жүк салғышынан заңсыз сексеуіл бұталары табылды. Аталған дерек бойынша Қазақстан Республикасы Қылмыстық Кодексінің 340-бабы, 1-бөлігі бойынша (ағаштар мен бұталарды заңсыз кесу) қылмыстық іс қозғалып, тергеу амалдары жүргізілуде.
Қызылорда облысы, Жалағаш ауданында 1980 жылы туылған 2 азамат түн мезгілінде аң аулап жүрген жерінен қолға түсті. Ұсталғандарға тиесілі «Нива» маркалы автокөлігін тексеру барысында, автокөліктің жүксалғышынан 3 қоянның өлі денесі анықталды. 2 ұңғылы, 12 калибрлі аңшы мылтығы, 1 дана прожектор айғақ зат ретінде алынды. Қазақстан Республикасы Қылмыстық Кодексінің 337-бабы, 1-бөлігі бойынша қылмыстық іс қозғалып, сотқа дейінгі тергеп-тексеру амалдары жүргізілуде.
