Бразилияда тікұшақ апатынан 5 адам опат болды
АСТАНА. ҚазАқпарат - Бразилияның Сан-Паулу штатында тікұшақ апаты салдарынан бес адам ажал құшты. Бұл туралы полиция қызметкерлері хабарлады, деп жазады ТАСС.
Әуе көлігінің бортында бақуатты бизнесменнің отбасы болған, ол екі жасар сәбиінің дене қызуы көтерілген соң Сан-Паулудағы ауруханаға жетуді көздеген. Ол үшін осы жанұя рождестволық мерекелерді атап өтіп жатқан мұхит жағалауындағы шипажайға шұғыл AS-350 тікұшағы шақырылған. Тікұшақ белгісіз себептермен басқаруға көнбей, ұшып шыққан аймағынан 5 шақырым қашықтықта жерге құлап, өртенген. Оның бортында болған адамдардың барлығы қаза тапты. Оқиғаны тергеу басталды.
