Астана тұрғыны брокер арқылы бағалы қағаздар нарығында заңсыз сауда жасағаны үшін істі болды

АСТАНА. KAZINFORM – Бағалы қағаздар нарығында манипуляция жасағаны үшін жеке тұлға жауапкершілікке тартылды.  Бұл туралы Астана қаласының прокуратурасы мәлім етті.  

«Бағалы қағаздар нарығында айла-шарғы мақсатында мәмілелер жасағаны үшін жеке тұлға Әкімшілік құқық бұзушылықтар туралы Кодексінің 259-бабы бойынша әкімшілік жауаптылыққа тартылды», — делінген хабарламада.

Аталған тұлға өзінің өтінімі бойынша екі брокер арқылы 6 күн ішінде нарықтың бір компаниясының акцияларымен 9 мәміле жасағаны анықталды, бұл бағалы қағаздар нарығы туралы Заңға және Ұлттық Банк Басқармасының қаулысына қайшы келеді.

Жасалған мәмілелер бағалы қағаздар нарығындағы сауда көлеміне айтарлықтай әсер етті.

Прокуратураның ден қою актісі бойынша сотпен кінәлі тұлға 2,2 млн теңге мөлшерінде айыппұл түрінде әкімшілік жауаптылыққа тартылды.

Шешім заңды күшіне енді.