Бүгін Алматыда мұсылман қолжазбалары мен артефактілерді сақтау мен қалпына келтіру мәселелері талқыланды
АЛМАТЫ. 21 Желтоқсан. ҚазАқпарат /Нәзира Елеухан/ - Бүгін Алматыда Ұлттық кітапханада мұсылман қолжазбалары мен артефактілерін жинақтау, сақтау мен қалпына келтіру жөніндегі мамандардың аймақтық кездесуі болып өтті.
«Кездесудің мақсаты - мұсылман қолжазбаларын зерттеу жөнінде тәжірибе алмасу, қазақстандық және маманданған мекемелер арасындағы әріптестік шеңберін кеңейту және сондай-ақ осы мәселемен айналысатын шетелдік орталықтармен қарым-қатынасты жандандыру болып табылады», - деді Р.Б.Сүлейменов атындағы Шығыстану институтының директоры, тарих ғылымдарының докторы, профессор Меруерт Әбусейітова.
Оның айтуынша, Қазақстан тәуелсіздік алуымен мұсылман ескерткіштерін анықтау, зерттеу, санаққа алу және насихаттау секілді жұмыстар жандана түскен. «Сондықтан қазіргі уақытта ғылыми және практикалық мәні бар ең өзекті мәселе туындап отыр, ол - тікелей ұлттық кадрлерді дайындайтын мұсылман қолжазбаларының жалпыұлттық ортақ қорын құру мәселесі. Елімізде аса құнды мағлұматтарды, қолжазбаларды сақтайтын бірыңғай база болатын Қазақстандық орталық құру қажет», - деді Меруерт Әбусейітова.
Кездесуге қатысқан мамандардың пікірінше, Қазақстан мен Орталық Азия ғасырлар бойы ислам өркениетінің қалыптасуы мен дамуына қомақты үлес қосып келеді. «Оған мемлекеттік қорлар мен жеке қорларда сақталған араб жазуымен жазылған қомақты мөлшердегі аса құнды жазбалар басты дәлел бола алады», - деді мамандар. Олардың айтуынша, қазақ, шағатай, түрік, араб және парсы тілдерінде жазылған бұл қолжазба ескерткіштерде Орталық Азия аймағының тарихы мен мәдениетіне қатысты аса құнды мағлұматтар сақталған.
