Бүгін - Қасиетті Қадір түні
АСТАНА. Қыркүйектің 15-і. ҚазАқпарат - Бүгін - барлық мұсылман қауымы үшін Қасиетті Қадір түні. (2009 жылғы қыркүйектің 15-16). Айлардың ұлығы - Рамазан, күндердің ұлығы - жұма болса, түндердің шапағаттысы - Қадір түні. Алла Тағаланың қасиетті кітабы - Құран Кәрімнің алғашқы сүрелері рамазан айының 26-сынан 27-сіне қараған түні түскен. Осы кештің қасиеті мың айдан артық делінген аят бар.
Мұсылмандар бұл түнді ұйқысыз өткізіп, он сегіз мың ғаламды, барша адамзатты, бүкіл тіршілікті жаратушы жалғыз Алладан тілек тілеген. Пайғамбарымыздың (с.ғ.с.) бір хадисінде осы түнге шын иланып сұралған тілек қабыл болады делінген. Жәннат төрт түрлі мүмінді ерекше күтеді: Біріншісі - осы айда арнайы Құран оқыған адам; Екіншісі - ораза кезінде өсек-өтіріктен, дау-жанжалдан аулақ, тіліне сақ болған адам; Үшіншісі - аш адамдарға және ораза тұтушыларға тамақ бергендер. Алла Тағала ондай қайырым жасағандарға кәусар суынан ішкізеді. Оны ішкендер ешқашан шөлдемейді және жәннат иесі болады; Төртіншісі - рамазанда арнайы ораза тұтқан адамдар.
