Букмекерлік кеңселердің бәс тігу және ұтыс төлеу операциялары қалай бақыланады
АСТАНА. KAZINFORM — Қазақстанда заңсыз құмар ойындарға қатысы бар деген күдікпен 235 мыңнан астам интернет-ресурс анықталып, заңға қайшы 211 мыңнан астам сілтеме бұғатталды. Бұл туралы Құмар ойындарды талдау және мониторинг орталығы букмекерлік кеңселердің қызметі қалай бақыланатынын түсіндіру барысында айтты.
Мұндай бақылаудың негізгі тетіктерінің бірі — Бірыңғай есепке алу жүйесі. 2026 жылғы 27 наурыздан бастап еліміздегі заңды букмекерлік кеңселер мен тотализаторлар осы жүйені міндетті түрде пайдалануға тиіс. Букмекерлік кеңселерге жүйеден тыс бәс тігуге мүмкіндік беруге және ұтыс ақшасын төлеуге тыйым салынған.
Бірыңғай есепке алу жүйесінде әр операция туралы мәлімет тіркеледі. Атап айтқанда, бәс тігілген уақыт, оның сомасы, коэффициенті, бәстің шарттары, нәтижесі және ұтыс мөлшері есепке алынады. Сондай-ақ электронды әмияндар арқылы жүргізілген ақша операциялары да тіркеледі.
Орталықтың мәліметінше, бұл деректер әр операцияның қалай жүргізілгенін анықтауға мүмкіндік береді. Бәс тігуші мен букмекерлік кеңсе арасында дау туындаған жағдайда жүйеде сақталған ақпаратты пайдалануға болады. Ұтыс ақшасы да бәс тігілген электронды әмиянға аударылады.
Жүйе қаржы операцияларын тіркеумен ғана шектелмейді. Ол бәс тіккісі келген адамның құмар ойындарға қатысуына заң бойынша рұқсат бар-жоғын да тексереді. Ол үшін пайдаланушының деректері мемлекеттік тізілімдердегі мәліметтермен автоматты түрде салыстырылады.
— Тексеру заңда белгіленген шектеулерді ескере отырып жүргізіледі. Атап айтқанда, 21 жасқа толмаған адамдарға, құмар ойындарға қатысудан өз еркімен бас тартқан азаматтарға, сондай-ақ қылмыстық жазаға байланысты тиісті шектеулер қойылған адамдарға бәс тігуге рұқсат етілмейді, — деп хабарлады Құмар ойындарды талдау және мониторинг орталығы.
Сонымен қатар сот шешімдерін орындамағаны үшін Борышкерлердің бірыңғай тізіліміне енгізілген азаматтарға да шектеу қойылады. Мәселен, алимент төлеу жөніндегі сот шешімін орындамаған адамдар бәс тіге алмайды. Ал банкте несиесінің немесе ипотекасының болуы өздігінен мұндай тыйым салуға негіз болмайды.
Заңды букмекерлік кеңселердің қызметін бақылаумен қатар, интернеттегі заңсыз құмар ойындарға қатысты ресурстар да анықталып жатыр. Орталықтың дерегінше, 2026 жылғы қазанға дейін заңсыз қызмет белгілері бар 235 мыңнан астам интернет-ресурс анықталған. Оның ішінде заңға қайшы 211 мыңнан астам сілтеме бұғатталған.
Ұйым өкілдерінің айтуынша, мұндай ресурстарды анықтау жұмысы бәс тігу операцияларын есепке алу және пайдаланушыларды тексеру шараларымен қатар жүргізіледі. Ал бақылаудың алдағы нәтижесі мемлекеттік тізілімдердегі мәліметтердің қаншалықты жаңартылып отыратынына және заңсыз жұмыс істейтін жаңа интернет-ресурстардың дер кезінде анықталуына да байланысты.
Бұған дейін букмекерлік қаражатты бөлу тәртібі өзгеретіні хабарланды.
