Бұқтырмада «Қызыл ту» мұзды өткелі жабылды

ӨСКЕМЕН. KAZINFORM – Шығыс Қазақстан облысындағы Бұқтырма су қоймасында қызыл су жүріп, «Қызыл ту» мұзды өткелі жабылды.

ШҚО әкімдігінің мәліметіне сүйенсек, 13 наурыз күні ауа райының күрт жылынып, сілбі қар жаууына орай Бұқтырма су қоймасының мұзы ыдырап, қызыл су жүріп кетті.

«Осыған байланысты су қоймасы арқылы өтетін «Қызыл ту» мұзды өткелі барлық көлік түрі үшін жабылды. Мұзбен өту аса қауіпті. Сол үшін көлік жүргізушілерінен өзінің және жолаушылардың өміріне қауіп төндірмес үшін өткелмен жүруден аулақ болуға шақырамыз», - делінген ақпаратта.

Еске салсақ, бұған дейін Өскеменде өзенде мұз кептеліп, 20 саяжайдың ауласын су басқаны хабарланған.