Бұл қазақ халқының жеңісі — Жәнібек Әлімханұлының командасы
АСТАНА. KAZINFORM — Кәсіпқой боксшы Жәнібек Әлімханұлы орта салмақтағы WBO және IBF нұсқасы бойынша чемпион атағын сәтті қорғағаннан кейінгі сезімімен бөлісті, деп хабарлайды Kazinform тілшісі.
— Бүкіл қазақ елін жеңісімен құттықтаймын! Осы кеште мені қолдағандардың барлығына алғысымды білдіремін. Алдымда үлкен жауапкершілік болды, өйткені жекпе-жек туған жерімде, Астанада өтті. Біз көрермендерге керемет жекпе-жек көрсеткіміз келді. Міне, сіздер бұл оқиғаның куәсі болдыңыздар. Барлығына тағы да алғыс айтамын, — деді Жәнібек Әлімханұлы жекпе-жектен кейін.
Оның менеджері Берік Сұлтанның сөзінше, бұл жеңіс тек команданың ғана емес, барлық қазақстандықтың, сондай-ақ Qazaq Style жанкүйерлерінің жетістігі екенін айтты.
— Бұл — тарихи сәт. Біз екі чемпиондық титулды қорғадық, енді біздің мақсатымыз — барлық төрт белдікті алу. Біз осы бағытта жүреміз. Тұрақты түрде қолдау көрсеткені үшін Президент Қасым-Жомарт Кемелұлына, сондай-ақ Спорт және туризм министрі Ербол ағаға (Мырзабосынов — ред.), Кеңес Рақышевке рахмет. Бұл бүкіл қазақ халқының жеңісі, — деді ол.
Айта кетейік, бүгін орта салмақта WBO және IBF нұсқасы бойынша әлем чемпионы, қазақстандық кәсіпқой боксшы Жәнібек Әлімханұлы (16-0, 11КО) Астанада өтіп жатқан «Battle of the Brave» бокс кешінің басты жекпе-жегінде өнер көрсетті. Ол қарсыласын нокаутпен жеңді.
Артынша Мемлекет басшысы кәсіпқой боксшы Жәнібек Әлімханұлын орта салмақта WBO және IBF тұжырымдары бойынша чемпиондық белбеулерін сәтті қорғауымен құттықтады.
