Бурабай ауданында коммуналдық қызметтерге тариф төмендеді

КӨКШЕТАУ. KAZINFORM – Ақмола облысы Бурабай ауданы прокуратурасының қызметкерлері тұрмыстық қатты қалдықтарды жинауға, тасымалдауға және көмуге арналған тарифті қалыптастыру кезіндегі заңнаманың бұзылуын анықтады.

Мәселен, қадағалау ведомствосы электр және жылу энергиясы, ғимараттар мен құрылыстарды ұстау, сондай-ақ амортизацияға арналған шығындарды тарифтік сметаға негізсіз енгізу фактілерін анықтады.

Аталған бұзушылықтар бойынша прокуратура прокурорлық қадағалау актісін енгізді.

«Нәтижесінде абаттандырылған үйде тұратын бір тұрғынға тарифтің құны 37,70 теңгеге (ҚҚС қоспағанда 1 текше метр үшін 420 теңгеден 382,30 теңгеге), ал абаттандырылмаған үйлер үшін 40,91 теңгеге (ҚҚС қоспағанда 1 текше метр үшін 455,85 теңгеден 414,94 теңгеге) төмендетілді. Кінәлі лауазымды тұлғалар жауапкершілікке тартылды», — деп жазды ведомстводан.

Осылайша, 10 173 тутынушының, оның ішінде 183 заңды тұлғаның мүдделері қорғалды.