Бурабайда 4 жастағы бала екінші қабаттың терезесінен құлап кетті

КӨКШЕТАУ. KAZINFORM – Бурабайда 4 жастағы бала екінші қабаттың терезесінен құлап, ауруханаға түсті.

Ақмола облысы ПД баспасөз қызметінің мәліметінше, келеңсіз жағдай Бурабай кентіндегі демалыс орындарының бірінде болды. 

Анықталғандай, 4 жастағы бала жалдамалы үйдің екінші қабатында жалғыз қалған. Зардап шеккен бала түрлі дене жарақатымен ауруханаға жатқызылды. 

«Осы дерекке байланысты Қылмыстық кодекстің 141-бабы 1-бөлігі (балаларды тәрбиелеу жөніндегі міндеттерді орындамау) бойынша сотқа дейінгі тергеп-тексеру басталды. Сонымен бірге, бірқатар сараптамалар тағайындалды», - деді ведомстводан.

Айта кетсек, бұдан бұрын Ақмола облысында 1 жастан асқан бала терезеден құлағанын жазған едік.