БҰҰ ауғандық әйелдердің киім үлгісі үшін тұтқындалуына алаңдаушылық білдірді
АСТАНА.KAZINFORM - Біріккен Ұлттар Ұйымы «Талибан» қозғалысының ауғандық әйелдер мен қыздарды үкіметтің киім үлгісін сақтамады деген айыппен қамауға алуына алаңдаушылық білдірді, деп жазады Euronews.
— Бұл оқиға әйелдер мен қыздарды одан әрі оқшаулауға, қорқыныш ахуалын туғызуға және қоғамдық сенімге нұқсан келтіруге қызмет етеді, — деді ұйым өкілі. Алайда ол қамауға алынғандардың саны, жасы және олардың қайда екені туралы нақты ақпарат бермеді.
БҰҰ миссиясы Талибан үкіметін әйелдер мен қыздардың адам құқықтары мен негізгі бостандықтарын шектейтін, оның ішінде алтыншы сыныптан кейінгі білім алуға тыйым салатын «саясат пен тәжірибені жоюға» шақырды. Ол сондай-ақ 16-19 шілде аралығында Кабулда «көптеген» әйелдер мен қыздардың тұтқындалуына алаңдаушылық білдірді, олар биліктің пайымдауынша, хиджаб немесе исламдық орамал тағу туралы нұсқауларды орындамаған.
2024 жылдың қаңтарында елдің Әдеп және ізгілік министрлігі Ауғанстан астанасында әйелдерді «хиджабты дұрыс кимегені» үшін қамауға алғанын хабарлады. Министрліктің баспасөз хатшысы Абдул Гафар Фарук қанша әйелдің қамауға алынғанын айтпады.
Біріккен Ұлттар Ұйымының миссиясы сол кезде оларды бостандыққа шығару үшін қорлау мен бопсалау фактілерін тексеріп жатқанын айтты.
2022 жылдың мамыр айында Талибан үкіметі әйелдерді тек көздерін көрсетіп, басынан аяғына дейін паранжа киюге міндеттейтін жарлық шығарды. Әйелдердің қоғамдық орындарда қалай киінуіне және өзін ұстауына бақылау да күшейтілді, атап айтқанда, олардың үйден тыс жерде беттерін көрсетуіне тыйым салатын моральдық заң қабылданды.
Бұған дейін Ауғанстандағы жалғыз киностудия жабылғаны хабарланған болатын.
