БҰҰ Бас хатшысы Алепподағы «айуандықтар» туралы хабарламаларға алаңдаулы

АСТАНА. ҚазАқпарат - БҰҰ Бас хатшысы Пан Ги Мун Алепподағы бейбіт тұрғындарға қатысты «айуандықтар» туралы хабарламаларға алаңдаушылық білдіретінін жеткізді, деп хабарлады «ҚазАқпарат» ХАА ұйымның баспасөз қызметіне сілтеме жасап.

«Бас хатшы соңғы сағаттарда Алепподағы «айуандықтар» туралы хабарламалардан соң, ондағы азаматтар үшін,соның ішінде әйелдер мен балаларға алаңдаулы екенін мәлімдеді», - делінген хабарламада.

Бұл ретте, БҰҰ тәуелсіз дереккөздерден алынған бұл ақпаратты растай алмайтындығын атап өтті.

Осыған байланысты Пан Ги Мун Сириядағы БҰҰ арнайы елшісіне нұсқау беріп, жағдайға қатысы бар тараптармен мәселені талқылауды жүктеді.

Сирия әскері шығыс Алепподағы шайқаста жеңіске жеткенін жақын арада мәлімдеуге дайын, деп хабарлады Reuters агенттігі Сириядағы әскери дереккөзге сілтеме жасап.

Сириядағы жауласқан тараптарды ымыраға келтіру жөніндегі Ресей орталығының мәлімдеуінше, сириялық әскер қала аумағының 95% қадағалап отыр. Дүйсенбі күнгі ақпарат бойынша, үкіметтік жасақ Шейх-Саид, Карим-Хум және Әл-Макамад аудандарын содырлардан азат еткен.