БҰҰ Бас хатшысы Солтүстік Кореяның американдық журналистерін босатқанына ризашылығын білдірді
НЬЮ-ЙОРК. Тамыздың 6-сы. ҚазАқпарат /Әлия Алтынғазина/ - Құрама Штаттардың экс-президенті Билл Клинтон Пхеньянға жасаған сапары барысында Солтүстік Корея үкіметі 12 жылға соттаған американдық екі журналисті босатуға қол жеткізді,
деп хабарлайды ҚазАқпарат.
Екі журналистің ел шекарасын заңсыз кесіп өткені үшін сотталғанын бұдан бұрын хабарлаған болатынбыз.
«Current TV» (Сан-Франциско) телекомпаниясының репортерлары Юн Ли мен Лора Лиин мінген ұшақ сәрсенбі күні таңертең Калифорния штатындағы Бурбанк қаласының әуежайына қонды. Қамауда 140 күн отырған журналистер Билл Клинтонның Ким Чен Ирмен болған келіссөзінен кейін босатылды.
БҰҰ Бас хатшысы Пан Ги Мун солтүстіккорей өкіметінің шешіміне ризашылығын білдіріп, АҚШ экс-президентін табысты гуманитарлық миссиясымен құттықтады.
