БҰҰ басшысы «сауда соғысының» жаһандық экономикаға қауіп төндіретінін ескертті

АСТАНА. KAZINFORM – БҰҰ Бас хатшысы Антониу Гутерриш «сауда соғысында жеңімпаздар жоқ» екенін ескертті. Бұл туралы жұма күні оның ресми өкілі Стефан Дюжаррик мәлімдеді, деп хабарлайды Синьхуа ақпарат агенттігі. 

Кең ауқымды оппозицияға қарамастан, АҚШ президенті Дональд Трамп сәрсенбі күні кейбір сауда серіктестері үшін 10 пайыздық «ең төменгі базалық тариф» және жоғары баж салығын енгізіп, «баламалы тариф» деп аталатын шараларды енгізу туралы бұйрыққа қол қойды. 

Дүниежүзілік ұйым басшысының Ақ үйдің соңғы тариф саясатына қатысты түсініктемелеріне қатысты сұраққа С. Дюжаррик «сауда соғысында жеңімпаздар жоқ» деп жауап берді.

– Қазір бізді қазіргі уақыттағы жағдайға төтеп бере алмайтын елдер алаңдатып отыр, - деп қосты баспасөз хатшысы. 

Ол жаһандық сауда соғысы БҰҰ-ның Тұрақты даму мақсаттарына қол жеткізуге «кері әсер ететінін» атап өтті.

БҰҰ Сауда және даму жөніндегі конференциясының (ЮНКТАД) жұма күні таратылған мәлімдемесінде Құрама Штаттар енгізген тарифтер осал елдерге зиян тигізетіні айтылады. Мәтінде ірі экономикалар жаппай жаңа тарифтер енгізуге дайындалып жатқанда, «жаһандық сауда жүйесі дағдарысты кезеңге өтіп, өсім, инвестиция және дамудың ілгерілеуі тәуекелге ұшырап отыр» делінген.