БҰҰ-дағы Иран елшісі: Болгариядағы лаңкестікті Израиль ұйымдастырды
АСТАНА. 26 шілде. ҚазАқпарат - Біріккен Ұлттар Ұйымындағы Иран елшісі Мохаммед Хазаи 18 шілде күні халықаралық Сарафово әуежайының тұрағында, Болгарияның Бургас қаласында орын алған лаңкестік актіні израильдік билік өкілдері ұйымдастырды деп кінәлады.
«Сионистік криминалдық режімнің өкілдері менің елімді негізсіз айыптады. Иран ешқашанда бейкүнә адамдарға жасалған мұндай қара ниетті шабуылға қатыспайды», - деді ирандық дипломат.
Естеріңізге сала кетейік, 18 шілде күні кешке қарай Бургастың халықаралық әуежай тұрағында демалуға келген израильдік туристер мінген автобус жарылған болатын. Жарылғыш затты жанкешті-лаңкес іске қосты. Оқиға салдарынан 7 адам ажал құшып, 33 турист жеңіл жараланды. Ал бір әйел мен бір ер адам аса ауыр халде ауруханаға жеткізілген еді.
Лаңкестік әрекеттің артынша Израильдің премьер-министрі Биньямин Нетаньяху бұл жарылысты Иран ұйымдастырды деп айыптады.
Бұл келеңсіз оқиғадан 3 күн өткеннен кейін Бургастағы жарылысты бұған дейін беймәлім болып келген, өздерін «Джихад негізі» деп атайтын лаңкестік ұйым өз мойнына алды.
