БҰҰ: Ормуз бұғазының жабылуынан миллиондаған адам аштыққа ұшырауы мүмкін
АСТАНА. KAZINFORM - Біріккен Ұлттар Ұйымы Ормуз бұғазының жабылуы салдарынан алдағы бірнеше аптада ауыр гуманитарлық дағдарыс басталуы мүмкін екенін ескертті, деп жазады BILD.
Ұйым өкілдерінің мәліметінше, әлемде 45 миллионға жуық адам аштыққа ұшырауы ықтимал.
Бұл туралы БҰҰ өкілі Жорже Морейра да Силва мәлімдеді.
Мәселенің негізгі себебі — тыңайтқыш жеткізу тізбегінің бұзылуы.
Тыңайтқыштар әлемдік азық-түлік өндірісінде шешуші рөл атқарады.
Бұған дейін олардың бір бөлігі теңіз арқылы, соның ішінде Иран жапқан Ормуз бұғазы арқылы тасымалданған.
Мамандар тыңайтқыш тапшылығы егін өнімділігінің төмендеуіне әкелуі мүмкін екенін айтып отыр.
Сонымен қатар азық-түлік бағасының күрт өсу қаупі де күшейген.
БҰҰ Азық-түлік және ауыл шаруашылығы ұйымы мемлекеттерді жедел балама сауда бағыттарын іздеуге шақырды.
Ұйым сондай-ақ тыңайтқыш экспортына шектеу қоймауға үндеді.
Сарапшылардың пікірінше, мұндай шаралар қабылданбаса, жағдай ірі гуманитарлық апатқа ұласуы мүмкін.
Осыған дейін БҰҰ өкілдері Ормуз бұғазы жаһандық азық-түлік дағдарысын тудыруы мүмкін екенін айтқан болатын.
