Былтырғы он айда Қазақстанның сыртқы тауар айналымы 34,1%-ға өсті - Серік Жұманғарин

АСТАНА. ҚазАқпарат – Өткен жылы Қазақстанның сыртқы тауар айналымы 34,1 пайызға артып, 110,6 млрд долларға жетті. Бұл туралы Премьер-министр Әлихан Смайыловтың төрағалығымен өткен Сауда және интеграция министрлігінің кеңейтілген алқа отырысында министр Серік Жұманғарин мәлім етті, деп хабарлайды «ҚазАқпарат» тілшісі.

«2022 жылдың 10 айының қорытындысы бойынша Қазақстанның сыртқы тауар айналымы 2021 жылдың сәйкес кезеңімен салыстырғанда 34,1%-ға ұлғайып, 110,6 млрд доллар болды. Еуразиялық экономикалық одақ шеңберіндегі тауар айналымы – 23 млрд доллар. Бұл – 2021 жылдың ұқсас кезеңінен 7,5 пайызға артық. Сонымен қатар, кедендік әкелу баждарының сомаларын бөлмеу мүмкіндігі мақұлданды. Осы арқылы үнемдеу болжамы – 100 млн доллардан астам. Бір жыл ішінде серіктес елдер қойған 6 кедергі жойылды, экспорттық өсім болжамы – 500 млн доллар. Биыл 8 кедергіні алу жоспарланып отыр, олардың өсім болжамы – 800 млн доллар», - деді министр Серік Жұманғарин.