Бюджет жобасын ұсынудың форматы өзгереді - Сенат

Парламент қабылдаған заң бюджетті жоспарлау сапасын жоғарылатуды қамтып, бюджет жобасын ұсынудың форматын өзгертетін болады. Мәселен, құжатқа сәйкес, министрлер мен облыс, Астана және Алматы қалаларының әкімдері үшін түйінді индикаторларды бекіту қарастырылады. Стратегиялық жоспарлар мен бюджеттік бағдарламалардың жаңа форматын енгізу, бюджеттің орындалуы туралы есепті ұсыну форматын өзгерту көзделеді. Сонымен қатар мемлекеттік органдардың дербестігін кеңейту және жауапкершілігін арттыру мақсатында мемлекеттік органдарға шағын бағдарламаларды қоспағанда, бюджеттік бағдарлама бойынша шығыстардың жылдық көлемін өзгертпестен дербес қайта бөлу құқығы беріледі. «Бұл ретте бір бюджеттік бағдарлама шегінде инвестициялық жобалар және шағын бюджеттік даму бағдарламалары арасында бюджет комиссиясында қарамастан, 10 пайыздан аспайтын, сондай-ақ бюджет комиссиясының міндетті түрде қарауымен 10 пайыздан артық көлемде қаражатты қайта бөлу мүмкіндігі беріледі. Бұндай құқықты беруге байланысты бюджеттік бағдарламалардың тікелей және түпкілікті нәтижелеріне қол жеткізілмегені үшін мемлекеттік органдардың бірінші басшылары және бюджеттік бағдарламалар басшыларының тәртіптік жауапкершілігі енгізіледі», - дейді Ұлттық экономика министрі Ерболат Досаев. Сонымен қатар заң арқылы Ұлттық қордың қаражатын пайдаланудың тиімділігін арттыру, оны қалыптастырудың және пайдаланудың жылдық есебінің сапасын көтеруге бағытталған шаралар да қамтылып отыр.