БЖЗҚ онлайн қызмет көрсетуді дамытпақ
АЛМАТЫ. ҚазАқпарат - БЖЗҚ онлайн қызмет көрсету саласын кеңейте түспек, деп хабарлайды ҚазАқпарат тілшісі. 2017 жылдың маусымынан бастап 3 қызмет тестілеуден өткізіліп жатыр.
«Атап айтқанда, жеке зейнетақы шотын ашу туралы арызды онлайн режімде беруге болады. 30 маусымнан бастап бұл қызмет толық жұмыс жасай бастайды. Сондай-ақ, зейнет жасына жеткен адамдар немесе 1-2 топтағы мүгедектер де зейнетақы алуға өтінішті онлайн толтыратын болады. Алғашқы өтінімдер берілді. Өтінімді өңдеуге бірнеше минут кетеді. Сонымен қатар, өтінімнің мәртебесін онлайн режімде көріп отыруға болады», - деді «БЖЗҚ» басқарушы директоры Жанар Төлегенова.
Айта кету керек, мұндай қызметтерді онлайн режімде алу үшін электронды цифрлық қолтаңба болуы тиіс.
Зейнетақы төлемдерін тағайындау жөнінде өтініш беру үшін, ЭЦҚ-дан басқа Қазақстан Республикасы аумағында ұлттық валютамен (теңге) екінші дәрежелі банкте немесе «Қазпошта» АҚ-та ашылған, 20 саннан тұратын банк шоты туралы мәліметті және екінші дәрежелі банктің деректемелерін көрсету қажет. Бұл ретте БЖЗҚ алушыға төлемдерді тағайындау немесе аудару жөніндегі өтініштің орындалуы туралы СМС-хабарлама жіберу арқылы құлағдар етеді.
«2017 жылдың үшінші тоқсанында тағы бір сервис қолданысқа енеді. БЖЗҚ дерекқорында көрсетілген салымшының қосымша деректемелеріне өзгерістер/ толықтырулар енгізу мүмкін болатын болды. Бұл деректемелерге жеке басты куәландыратын құжаттың деректері (түрі, нөмірі, күні мен осы құжатты берген орган), пошталық немесе электрондық мекенжай, телефон нөмірлері (үй, жұмыс, ұялы) жатады», - деді Жанар Төлегенова.
