Чехиядағы додада үш боксшымыз финалға шықты

АСТАНА. 16 наурыз. ҚазАқпарат - Чехияда бокстан өтіп жатқан халықаралық турнирдің финалына үш қазақ боксшысы шықты, деп хабарлайды «Аламан».

Лондон Олимпиадасына қатысқан Ілияс Сүлейменов жартылай финалда сербиялық Милош Балтичтен басым түсті - 16:8. Енді ол Май Кинксиксянмен «алтынға» таласады.

81 келіде Олимпиаданың күміс жүлдегері Әділбек Ниязымбетов қытай Менг Фанлонгты 14:7 есебімен жеңіп, финалға шықты. Ол енді голландиялық Петер Мулленбергпен күш сынасады.

Аса ауыр салмақта Иван Дычко ресейлік Еуропа чемпионы Магомед Омаровты ұтты - 13:12. Енді ол Армения боксшысы Армен Симонянмен бас жүлдеге таласады. Финалдық кездесулер бүгін, 16 наурызда өтеді.