Циклон Қазақстанға тұрақсыз ауа райын әкеледі - 28 ақпанға арналған ауа райы болжамы
АСТАНА. 27 ақпан. ҚазАқпарат - ҚР-ның басым бөлігі циклонның ықпалында болуда, онымен бірге ауа райының тұрақсыз сипаты шамаланады: кейбір жерлерде жауын-шашындар өтіп, тұман түседі, жел күшейіп, республиканың солтүстігі мен шығысында бұрқасын болады, тек батыста ғана жауын-шашынсыз күн райы күтіледі. Бұл туралы Қазгидрометке сілтеме жасаған ҚР ТЖМ-нің баспасөз қызметінен хабарлайды.
Ақмола, Солтүстік Қазақстан, Қарағанды облыстарының кейбір жерлерінде бұрқасын болып, желдің 15-20 м/с дейін күшеюі ықтимал, жел екпіні 23-28 м/с дейін жетіп, кей жерлерде 30 м/с-тан асып түседі.
Қостанай, Павлодар облыстарында бұрқасын, желдің 15-20 м/с жылдамдықпен соғуы күтіледі, жел екпіні 23-28 м/с дейін жетеді.
Шығыс Қазақстан облысында күндіз кейбір жерлерде бұрқасын, желдің 15-20 м/с дейін соғуы, жел екпінінің 25 м/с дейін жетуі күтіледі.
Ақтөбе облысының кейбір жерлерінде желдің 15-20 м/с жылдамдықпен соғуы, бұрқасын күтіледі.
Батыс Қазақстан облысының кей жерлерінде бұрқасын, күндіз желдің 15-20 м/с дейін соғуы ықтимал.
Қызылорда, Атырау облыстарының бірқатар жерлерінде тұман, желдің 15-20 м/с дейін күшеюі күтіледі.
Жамбыл облысында кейбір жерлерде тұман, көктайғақ, желдің 15-20 м/с дейін күшеюі күтіледі.
Оңтүстік Қазақстан облысында түнде кейбір жерлерде тұман, көктайғақ, күндіз желдің 15-20 м/с жылдамдықпен соғуы күтіледі.
Алматы облысының кей жерлерінде тұман, көктайғақ болуы ықтимал.
Алдағы тәуліктерде республиканың оңтүстік және оңтүстік-шығысындағы жекелеген өзендерде мұз құбылыстарының әлсіреуі, су деңгейінің ауытқуы күтіледі. Қазақстанның қалған су нысандарында гидрологиялық режимде айтарлықтай өзгерістер күтілмеуде.
