Д. Өмірбаевтың «Студент» фильмі Португалияда өткен фестивальда арнайы жүлдеге ие болды
АСТАНА. 22 қараша. ҚазАқпарат - Режиссер Дәрежан Өмірбаевтың «Студент» фильмі 9-18 қараша аралығында Португалияда өткен Lisbon & Estoril Film Festival фестивалінде қазылар алқысының арнайы жүлдесіне ие болды.
Фильм негізгі конкурстық бағдармаға қатысты. Бұл туралы Ш. Айманов атындағы «Қазақфильм» АҚ-ның баспасөз қызметінен хабарлады.
Фестивальдің негізгі мақсаттарының бірі әртүрлі мәдени тәжірибені: киноны әдебиетке, музыканы сурет өнеріне араластыру болып табылады. Оған қоса, кинематографистер, ойшылдар, суретшілер мен көрермендер арасында диалог орнату. Ұйымдастырушылардың айтуынша, бұл - заманауи тақырыптарды көрсетіп, талқылайтын, аудиторияны Еуропа мен әлемнің тек танымал ғана емес, сондай-ақ аса танымал емес фильмдермен таныстыратын, португалдық киноөндірушілер үшін жаңа мүмкіндіктер ашатын жақсы алаң.
