Дамаск маңында микроавтобус жарылып, 14 адам зардап шекті
АСТАНА. KAZINFORM – Сирия астанасы Дамаск маңындағы Джарамана қаласында жолаушылар мінген микроавтобус жарылды. Салдарынан 14 адам жарақат алды. Билік оқиғаның мән-жайын анықтау үшін тергеу бастады, деп хабарлайды Kazinform агенттігінің меншікті тілшісі.
6 тамыз күні кешке Дамаск маңындағы Джарамана қаласында жолаушылар микроавтобусына қойылған жарылғыш құрылғы көлік қозғалыс кезінде іске қосылды.
Сирияның SANA агенттігі Ішкі істер және Денсаулық сақтау министрліктеріне сілтеме жасап хабарлағандай, жарылыс салдарынан 14 адам зардап шекті. Олардың үшеуінің жағдайы ауыр.
Сирия Ішкі істер министрлігінің мәліметінше, ішкі қауіпсіздік күштері оқиға болған аумақты қоршауға алып, айғақтарды жинауға кіріскен. Қазір жарылысты ұйымдастырғандарды анықтау және ұстау бағытында тергеу жүргізіліп жатыр.
-Арнайы бөлімшелер оқиға болған алғашқы минуттардан бастап тергеуге кірісті. Мақсат – қылмыстың барлық мән-жайын анықтап, кінәлілерді жауапқа тарту, – делінген ведомство мәлімдемесінде.
🚨 Breaking | Syria
— Fared Al Mahlool | فريد المحلول (@FARED_ALHOR) August 6, 2026
An explosion has been reported in the town of Jaramana, southeast of Damascus, Syria.
Preliminary reports indicate that the blast occurred aboard a public transport minibus, resulting in multiple injuries.
The circumstances surrounding the incident remain… pic.twitter.com/JACKg00atm
Жұма күні Сирия Денсаулық сақтау министрлігі бұған дейін тараған екі адамның қаза тапқаны туралы ақпараттың расталмағанын мәлімдеді.
Тексеру барысында оқиға орнынан табылған адам денесінің бөліктері қаза болғандарға емес, ауыр жараланып, операция жасалып жатқан зардап шеккендерге тиесілі екені анықталған.
Жаңартылған ресми мәліметке сәйкес, 14 адам жарақат алған, қаза тапқандар жоқ.
Әзірге Сирия билігі шабуылға қатысты ешкімге айып таққан жоқ.
Сирияның Сыртқы істер министрі Асаад аш-Шайбани әлеуметтік желідегі парақшасында шабуылды айыптап, мұндай әрекеттер елдегі өтпелі кезеңнің жалғасуына кедергі келтірмейтінін айтты.
-Бейбіт тұрғындарға жасалған шабуылдар мен қауіпсіздік пен тұрақтылықты бұзуға бағытталған әрекеттер сириялықтарды елді қалпына келтіру және мемлекеттік институттарды нығайту жолынан қайтара алмайды. Мемлекеттік органдар азаматтарды қорғау, осы қылмыстарды жасағандарды іздеп тауып, оларды жауапқа тарту жөніндегі міндетін орындауды жалғастырады, – деді министр.
Куәгерлердің айтуынша, жарылғыш құрылғы микроавтобустың ішіне жасырылған. Жарылыстан көлік түгелге жуық жойылған. Ал маңдағы дүкендер мен көрші автобусқа болмашы ғана зақым келген.
A bomb planted in a minibus killed two people and wounded several others on the outskirts of Syria's capital Damascus on August 6, officials said https://t.co/yMgNLKQ452 pic.twitter.com/QrBtHJ3X39
— Reuters (@Reuters) August 7, 2026
Жарылыс қарбалас уақытта Джарамана ауданының орталығындағы Әл-Рауда көшесінде болды. Бұл – негізінен друздар мен христиандар тұратын ауданның басты көшелерінің бірі.
Джарамана 2024 жылдың желтоқсанында бұрынғы президент Башар Асад елден кеткеннен бері тұрақсыздық ошағына айналды.
2025 жылдың басында мұнда қарулы друз жасақтары мен үкімет күштері арасында қақтығыстар болған.
Сол жылдың сәуір және мамыр айларында Джараманада конфессияаралық зорлық-зомбылық оқиғалары тіркелді. Кейіннен бұл жағдай Дамаск билігі мен Джарамана және Сувейдадағы друз қауымының жетекшілері арасында қарусыздану жөніндегі келісімдердің жасалуына негіз болды.
Al Jazeera телеарнасы соңғы күндері Джараманадағы ахуалдың қайта шиеленіскенін хабарлады. Екі күн бұрын қалада Сувейдадағы заңбұзушылықтарға кінәлілерді жауапқа тартуды талап еткен наразылық акциялары өткен.
Сирия астанасында жарылыс болып, бірнеше адам зардап шекті.
