Дамушы елдерге жөнелтілетін ақша аударылымдарының көлемі төмендеуде - Дүниежүзілік банк
деп хабарлайды ҚазАқпарат. Кірістің бұл түрі аталған мемлекеттердің жалпы ішкі өнімдерінің қомақты үлесін құрайды. Жұмысшы мигранттардан келетін қаражат көлемі бойынша Үндістан, Қытай және Мексика елдері көш басында.
Дүниежүзілік банк сарапшыларының болжамынша, 2009 жылы дамушы елдерге ақша аударылымдары 304 миллиард долларға дейін қысқарады. 2008 жылы бұл көрсеткіш 325 миллиард доллар болған. Көрсеткіштің 7,3 пайызға құлдырауы ағымдағы экономикалық дағдарыспен және жұмысшы мигранттар санының төмендеуімен байланысты.
Дегенмен, мигранттар баратын елдерде жұмыссыздық деңгейінің өсуі аталған елдерді шетел азаматтарын қабылдау жөніндегі заңнамаларын қатайтуға мәжбүрлеуі мүмкін. Ал бұл өз кезегінде ақша аударылымдарының әрі қарай қысқаруына себеп болатыны анық.