Дания АҚШ вице-президентінің Гренландияға сапарына реакция білдірді

АСТАНА. KAZINFORM — Дания Сыртқы істер министрі Ларс Лекке Расмуссен АҚШ әкімшілігін ел мен Гренландияны сынағаны үшін ренішін білдіріп, Копенгаген Арктика қауіпсіздігіне көбірек инвестиция салып жатқанын және АҚШ-пен тығыз ынтымақтастық үшін ашық екенін мәлімдеді.

28 наурыз, жұма күні Питуффик ғарыш базасына барған кезде Дж. Д. Вэнс АҚШ әскеріне Данияның Гренландияның қауіпсіздігіне «аз қаржы жұмсап жатқанын» мәлімдеп, Копенгагеннен көзқарасын өзгертуді талап етті. 

Жауап ретінде Данияның сыртқы істер министрі Трамп әкімшілігін сынап, оның елі Арктика қауіпсіздігіне жеткілікті инвестиция салып жатқанын мәлімдеді.

Бұл туралы Ларс Лекке Расмуссен әлеуметтік желіде жарияланған бейнероликте мәлімдеді.

— Көптеген айыптау мен пікір айтылды. Әрине, біз сынға ашықпыз, — деді Расмуссен, —  Бірақ ашық болуға рұқсат етіңіз: біз мұның қандай үнмен берілгенін құптамаймыз. Жақын одақтастармен бұлай сөйлеспейді. Мен әлі күнге дейін Дания мен АҚШ-ты жақын одақтастар деп санаймын.

Лекке Расмуссен өзінің бейнежазбасында Дания мен АҚШ арасындағы 1951 жылғы қорғаныс келісімін еске салды. Оның айтуынша, 1945 жылдан бері Гренландиядағы америкалық әскер саны қысқарды. Солтүстік-батыстағы шалғайдағы Питуффик ғарыш базасында бүгінде 200-ге жуық әскер қалды.

— 1951 жылғы келісім «Құрама Штаттарына Гренландиядағы әскери қатысуын айтарлықтай арттыруға кең мүмкіндік беріп отыр, — деп мәлімдеді сыртқы істер министрі, — Егер қаласаңыз, оны талқылайық.

Л.Расмуссен Данияның Арктика қорғанысына өз инвестициясын көбейткенін атап өтті.

Мысалы, қаңтарда Копенгаген үш жаңа әскери кеме, алыс қашықтыққа ұшатын ұшқышсыз ұшақтар мен спутниктерді қоса алғанда, Арктика қауіпсіздігін қамтамасыз етуге 14,6 млрд дат кронын (1,9 млрд еуро) бөлетінін жариялады. 

— Данияға жолдауымыз өте қарапайым: сіз Гренландия халқы үшін жақсы жұмыс жасаған жоқсыз. Сіз Гренландия халқына және керемет адамдарға толы осы әдемі жердің қауіпсіздік сәулетіне жеткілікті инвестиция салмадыңыз. Мұны өзгерту керек, — деді Вэнс жұма күні.

Осыған дейін Вэнс АҚШ-тың Гренландияға делегациясын басқаратыны хабарланды.