Даниял Райымбеков U19 әлем чемпионатында күміс жүлдеге ие болды

АСТАНА. KAZINFORM – АҚШ-тың Колорадо штаты, Пуэбло қаласында өтіп жатқан U19 жасқа дейінгі жастар арасындағы бокстан әлем чемпионатында қазақстандық Даниял Райымбеков және валлилік Томас Дэниэл Питт өзара алтынды сарапқа салды. 

Ұлттық олимпиадалық комитеттің мәліметінше, ақтық бәсеке 85 келіге дейінгі салмақ дәрежесі бойынша өтті. Нәтижесінде төрешілердің бірауыздан қабылдаған шешімімен Уэльс өкілі 5:0 есебімен алтынды қанжығасына байлады. Ал қазақстандық спортшы күміс жүлдегері атанды. 

Айта кетейік, 2 қараша күні Қазақстанның атынан Асылхан Көшербаев 65 келі салмақ дәрежесі бойынша өнер көрсететін болады. 

Еске салсақ, бұған дейін Қазақстанның 7 боксшысы жастар арасындағы әлем чемпионатының финалына шыққанын жазған едік.