Данияр Елеусінов пен Сұлтан Зәуірбек алғаш рет WBC рейтингіне енді
НҰР-СҰЛТАН. ҚазАқпарат – Дүниежүзілік бокс кеңесі (WBC) рейтингінің жаңартылған нұсқасы шықты, деп хабарлайды ҚазАқпарат Sports.kz сайтына сілтеме жасап.
Екінші орта салмақтағы WBC International Silver чемпионы Али Ахмедов 14-орында қалды, WBC Asia белдігінің иегері Айдос Ербосынұлы 35-тен 24-қатарға көтерілді.
WBC Continental Americas белдігіне ие орта салмақтағы Жәнібек Әлімханұлы 13-тен 10-орынға көтерілді, ал бұрын 24-ші позицияда тұрған USNBC чемпионы Мейірім Нұрсұлтанов 20-орынға жайғасты.
Бірінші орташа санаттағы Қанат Ислам бұрынғыша – 24-орында. WBC-тің жастар арасындағы әлем чемпионы және Азия чемпионы Садриддин Ахмедов аталмыш отандасынан екі саты төмен орналасып, 23-інші болды. Мадияр Әшкеев 40-орында қалды. Жартылай орта салмақтағы Нұрсұлтан Жаңабаев екі саты төмендеп, 32-орында тұр. Дивизион рейтингіндегі 33-ші орында – Данияр Елеусінов.
Бірінші жартылай орта салмақ дәрежесіндегі WBA Continental Americas чемпионы Батыр Жүкембаев 11-ден 12-ші орынға төмендеді.
Жеңіл салмақтағы WBC International титулының иегері Виктор Коточигов бұрынғы редакцияда 20-шы орында болса, бұл жолы ТОП-15-ке еніп, 13-ші орынға жайғасты. Екінші жартылай жеңіл салмақ дәрежесіндегі WBC Youth чемпионы Сұлтан Зәуірбек 36-орын алып, ТОП-40-қа енді.
